Chef Stage de Eddy Chu (尖沙咀)

 一年一度嘅紀念日又到啦，又係時候有藉口出去食餐好嘅。

由於太耐冇出街食飯，所以做咗好多資料搜集去搵好嘢食，無意中有記得之前黎過位於尖沙咀亞士厘道17-19號19樓既Chef Stage de Eddy chu， 交通方便，食物同服務都唔錯，決定再次光顧。

 

Chef Stage de Eddy Chu ，顧名思義，就梗係由老闆兼總廚既Eddy Chu坐鎮主理架啦。係Openrice度睇到，佢係酒店業界被喻為「西餐浪子」，入行超過三十年，仲曾任職多間星級酒店及高級會所添。

 

除左set dinner 之外，仲可以揀a la carte。由於唔想限制自己嘅選擇，所以揀咗a la carte 。

 

乳酪鮮蝦芒果雜菜沙律 :

沙律菜非常新鮮，鮮蝦肉質彈牙，加埋芒果後真係相當有口感。有別於一般嘅沙律，呢度冇用到沙律醬，反而用咗乳酪，仲要係分開上，鍾意落幾多就幾多。用乳酪去代替沙律醬，咁嘅做法味道會差唔多，但係脂肪含量肯定低啲。

 

忌廉鮑魚冬蔭海鮮湯 :

估唔到係西餐廳都會試到冬蔭公海鮮湯，呢個湯雖然係泰式，但係加入咗cream之後都有少少西式風味。最大驚喜係配料方面有鮑魚、帶子同埋蝦，鮑魚唔單止大隻，而且仲好爽口添。

 

鮮蟹肉濃湯配生蠔杯：

湯同生蠔分開上，賣相幾吸引，店員教我地先嚐一啖蟹肉濃湯，再食生蠔。生蠔加入醬汁後，入口酸酸地，非常開胃，鮮蟹肉濃湯未飲都聞到好香嘅海鮮味，飲落口感creamy，蟹肉味香濃，好好味，一邊飲湯一邊食生蠔，好有層次感。

 

明爐法式海龍皇原條鮮魚配鮑魚/鮮帶子/鮮蝦/鮮蜆：
原條鮮魚加入鮑魚、鮮帶子、鮮蝦、鮮蜆同大量車厘茄，加入蕃茄湯去煮，上檯時更用明爐送上，咁就唔使怕條魚凍得好快啦！
 
湯底入口鮮甜，魚亦都好滑，其他海鮮份量亦都好多，味道鮮甜，肉質清爽。

 

燒西班牙走地春雞：

春雞雖然製作需時，但係賣相真係相當吸引，除左有大大隻嘅雞之外，仲有蕃薯蓉、蕃茄同埋西蘭花做配菜，整體顏色配搭唔錯。

 

春雞焗得剛剛好，肉質香嫩幼滑，入口非常juicy，配埋燒汁食，非常惹味，認真唔錯。

 

朱古力心太軟配雲呢拿雪糕：

朱古力味香濃嘅心太軟，入口苦中帶甜，配埋雲呢拿雪糕食，一冷一熱嘅感覺，一苦一甜嘅口感，味道同口感真係令人回味。

 

埋單每人都係五百蚊左右，總括黎講，呢度無論環境、食物同服務都非常好，最值得一讚嘅係店員知道我地d食物係share食，會一道一道菜咁上枱，亦會係適當時候同我地換碟，方便客人之餘仲唔會騷擾到佢地。雖然唔係酒店餐廳，但係不論食物同服務，都令我感到自己係五星級酒店食飯一樣。

 

Openrice link: https://www.openrice.com/zh/hongkong/r-chef-stage-de-eddy-chu-尖沙咀-西式-酒-r434117

 

地址：尖沙咀亞士厘道17-19號19樓

Med Chef (尖沙咀)

 Med Chef 係一間CBD大麻素主題餐廳，主打Fusion菜。其實我之前都唔知係CBD，網上研究過後，得知佢係從大麻中抽取嘅一種鎮靜劑，其中一個功效係止痛及舒緩慢性痛症，尤其肌肉痛、腰痛、頭痛、關節痛等等；其次亦都能夠釋放內源性大麻毒，調整腦部對血清素嘅反應，從而舒緩緊張情緒，甚至促進幸福感，感覺好似跑步後嘅runner’s high。除此之外，CBD嘅鎮靜作用令到身體及心情都暫時得到放鬆，從而變得容易入睡，提供睡眠質素同埋拉長深層睡眠時間。

 

見到呢間餐廳咁得意，就決定黎試下啦。位於尖沙咀厚福街嘅Med Chef，相當有情調，感覺都幾舒服。

 

帶子蟹肉牛油果他他配醬油黑醋汁：

賣相相當吸引，蟹肉份量十足，配上北海道帶子，清新嘅墨西哥式牛油果醬，醬油同黑醋汁，拼埋好脆嘅薄多士食，口感非常豐富，滋味得黎亦好醒胃。

 

芒果莎莎吉列蝦墨西哥薄餅：

大大隻嘅吉列虎蝦，外皮香脆，蝦肉新鮮，啖啖蝦肉配上自家製嘅芒果莎莎醬，拼上厚身嘅薄餅食，簡直係完美嘅配搭。

 

青咖哩安吉拉雞捲：

呢味菜嘅感覺非常Fusion，似係墨西哥菜同泰菜Crossover，好有創意，泰式青咖喱汁加入蔬菜後淋上安吉拉雞捲，雞捲吸收了左咖哩嘅香辣味，層次非常豐富。

 

日式芥末忌廉香煎廣島蠔闊條麵：

日式芥末加入忌廉後中和左Wasabi本身果種攻鼻嘅辣味，非常特別。闊條麵煮得剛剛好，有Al dente 嘅口感，非常掛汁，配上肥美嘅廣島蠔，真係一個完美嘅組合。

 

成晚心情都好好，唔知關唔關食左加入CBD嘅食物事呢？

 

Openrice link: https://www.openrice.com/zh/hongkong/r-med-chef-尖沙咀-多國菜-海鮮-r693231

 

地址：尖沙咀厚福街12-12A號藍馬商業大廈1樓

Oasis Bar & Grill (尖沙咀)

恢復返晚市堂食之後，真係要珍惜呢個機會出下街，是日慶祝拍拖n個月紀念，係網上見到有介紹尖沙咀諾士佛臺以特色酒吧同餐廳為名嘅 Oasis Bar and Grill ，見到呢度嘅環境唔錯，好似坐得幾舒服，完全係女仕們心目中嘅「打卡餐廳」，就打算黎度試下啦。

餐廳嘅裝潢分為日與夜，以黑白色調分開兩個格調，「日」嘅一邊就以城市綠洲為主題，牆身係白色而天花係用上人造草皮，附近仲放左唔少植物同盆栽，帶俾人一種大自然嘅感覺。至於「夜」嘅一邊係燈光昏暗嘅酒吧格局，相當有情調，好有浪漫氣氛，部分座位更以雀籠同搖籃椅設計，好得意，非常適合女仕或情侶坐。

晚市除左可以揀set dinner之外，仲可以揀a la carte。由於想有多d 選擇，加上我地唔想要兩個main course，所以揀左散叫。

開始當然係叫返兩杯飲品先啦：

Lips of an angel :

由玫瑰糖漿、白桃蓉、柑橘、蘋果及梳打組成嘅Mocktail，甜美中帶玫瑰香，好適合女仔飲！

Eden garden :

滿滿薄荷葉嘅Mocktail，入口酸酸甜甜，有陣陣涼涼地嘅感覺，非常清爽。

海鮮生蠔拼盤：

既然係紀念日，梗係要嘆下啦，以「海鮮生蠔拼盤」作為是日晚餐嘅頭盤，內含四款海鮮，包括法國新鮮生蠔4隻，阿根廷紅蝦2隻，北海道帶子2隻以及青口4隻。除此之外仲有4種醬汁配搭肥美新鮮嘅海鮮，不過個人認為唔點醬汁更能品嚐到海鮮嘅鮮味。

生蠔都算幾大隻，首款生蠔 French Mont Blanc生蠔海水味偏淡，不過肉質creamy肥美，口感非常爽脆。第二款 French St Martin口感更為脆爽，入口鮮甜，並流露出一份礦物味道，味道特別細膩，層次豐富，柔滑兼備。

兩款生蠔加入檸檬汁亦見到蠔肉會收縮，裙邊會郁動，咁證明左生蠔真係非常新鮮呀。

阿根廷紅蝦勁多膏，爽口鮮甜。

北海道帶子潤白厚肉，非常新鮮，入口果份鮮甜嘅味道好耐都唔散，配上少少檸汁食，效果簡直一流。

青口肉質飽滿，勁新鮮，嚼勁十足 。

地中海烤雞配希臘沙律，火箭菜，辣紅椒汁：

慢煮嘅地中海烤雞加入左北非香料，烤得剛剛好，肉質香嫩幼滑，入口非常juicy，帶輕微焦香，配上辣紅椒汁食，非常惹味，風味十足。

伴碟嘅有希臘沙律同埋火箭菜，非常清新。

西班牙油炸鬼配朱古力醬及雲尼拿雪榚 ：

自從年幾前試過正宗既西班牙油炸鬼後，就對佢念念不忘，一有機會就要試。

其實西班牙油炸鬼可以話係鬼佬油炸鬼，同朋友一路傾計一路食就適合不過，上菜時仲係熱辣辣既「油炸鬼」，淋過糖霜後賣相非常吸引，上檯時仲係熱辣辣，入口外脆內軟，帶有淡淡既玉桂味，食嘅時候配上朱古力醬及雲尼拿雪榚，非常好味，真係令人食到停唔到口呀。

呢度空間感十足，檯同檯之間亦有足夠嘅距離，絕對係抗疫疲勞下一個唔錯嘅好去處。

Openrice link: https://www.openrice.com/zh/hongkong/r-oasis-bar-grill-尖沙咀-西式-r670602

地址：尖沙咀諾士佛臺1號8樓

蝦蝦燒 (佐敦)

 抗疫真係令人疲倦，好唔容易先有返晚市堂食，仲可以四人一檯，咁就梗係要約朋友出街啦。

太耐無出街食飯，真係有太多野想食，上網發現佐敦最近開左一間流水蝦BBQ放題，場地仲有成6000呎，部分霓虹燈裝飾都相當可愛。餐廳主打流水蝦，設有活蝦的水缸，仲有各式各樣嘅海鮮同肉類可以燒黎食，星期五晚市連加一每人都係$350左右。

 

坐低之後，店員就過黎幫我地開爐，個爐有兩層，上層可以燒一d快熟嘅野食，下層可以慢慢烤其他野食，爐具每層嘅面積都算大，一次可以放大約十幾隻蝦，火力都足夠，頭一轉店員仲會拎埋一碟蝦同埋每人一份活鮑魚同鱔同埋蒜蓉牛油蝦，鮑魚非常新鮮，條鱔亦相當肥美，一路燒一路散發出陣陣香噴噴嘅味道。

 

檯面放左粗鹽、孜然粉同埋辣粉椒鹽，出面仲有蒜蓉牛油同豉油可以拎，等大家可以自行調味。

 

流水蝦係呢度嘅精粹，要自己係個缸度夾隻生蝦出黎，再用最快速度放佢入冰水，過一陣先放上爐燒，過程真係要快，如果唔係隻蝦會跳架。

 

自助區有好多野食，海鮮檔口有鮑魚、帆立貝、流水蝦、帶子螺同海蜆，最令我驚喜嘅係居然有原條大眼雞。

 

肉類方面以串燒嘅方式提供，有牛肉、羊肉、雞肉，豬肉，雞翼、雞軟骨、雞腎、腸仔、丸等等。

 

蔬菜方面有原條茄子、粟米、翠玉瓜、燒菠蘿等等。

 

除此之外，仲有蒜蓉包，格仔餅可以烘黎食。

 

熟食有椒鹽蝦，麻辣螺，麻辣魚蛋等等。

 

飲品方面有各類汽水、茶、韓式飲品，甜品方面仲有雪糕雪條添呀。

 

流水蝦雖然比較細隻，但係味道相當鮮甜，d 蝦膏仲好正添呀，肉類方面整體上醃得唔錯，咁嘅價錢可以有咁難忘嘅體驗，真係性價比高呀。

 

openrice link: https://www.openrice.com/zh/hongkong/r-蝦蝦燒-佐敦-港式-海鮮-r693147 

 

地址： 佐敦白加士街10-24號永富大廈1樓